بوحه أصبح أبوحديد

تم تغيير اسم اللعبة لأبوحديد بدلاً من بوحة.. هاحكلكوا بسرعة كده الأسباب اللي ادت لكده..

لما جتلنا فكرة بوحة رحنا للشركة المنتجة للفيلم ( النصر-الماسة-أوسكار) وقعدنا مع الأستاذ محمد حسن رمزي و عملنا له ديمو للفكرة وعجبته جدا واتفقنا شفهيا علي عمل اللعبة وكمان طلع معانا في برنامج البيت بيتك في التلفزيون المصري وقال ان قد يه معجب بالفكرة وبالشباب و كلام من ده..؛ المهم بدأنا شغل في اللعبة ولما قربنا نخلص رجعنا للأستاذ رمزي اللي قال لنا ان المسئول عن الحاجات دي هو الأستاذ هشام عبد الخالق (صاحب الماسة – لاحظ انهم ثلاث شركات متضامنين النصر و الماسة و أوسكار)

المهم ، قعدنا مع الأستاذ هشام اللي برضه أعجب جدا بالفكرة والتنفيذ واختلفنا شوية علي النسبة اللي هياخدها عشان التوزيع و حقوق الملكية الفكرية (لاحظوا ان ديه ناس ما دفعتش أى حاجة كاستثمار فى المشروع، فالموضوع بالنسبلها مكسب من الهوا)، المهم في الأخر اتفقنا علي كل البنود و اساليب التوزيع ونسب تقسيم الأرباح الخ... و كانت نسبتهم في الموضوع مش قليلة..

وبعدين قالوا لنا انهم هايراجعوا عقد الفيلم عشان يفهموا مين اللي معاه الحقوق بالظبط واختفوا لفترة طويلة ولما قدرنا نوصلهم تاني قالوا لنا ان الشركاء اجتمعوا وقرروا انهم مش هيدخلوا مجال الجيمز! ليه؟ مش عايزين يقولوا السبب! طب ما قلتوش ليه من الأول؟؟ ده شغل سنتين تقريبا وتعب وسهر ليالي! ما فيش سبب واضح..

ناس قالت لنا ان عشان الموضوع جديد ماحدش عارف الحقوق مع مين، مع السيناريست ولا محمد سعد ولا شركة الإنتاج ولا ايه .. و ناس قالت لنا ده عشان الشركة متخانقة مع محمد سعد عشان راح للسبكي وناس قالت لنا قانونا ما حدش ليه حقوق في حاجة عشان الجيمز دي حاجة جديدة تماما عليهم..

مش عارفين والله ..و قعدنا نحاول في كذا سكة واتكلمنا مع مؤلف الفيلم نادر صلاح الدين اللي كان متعاون جدا الصراحة .. و لقينا ان احنا دخلنا في متاهات وتضييع وقت و اننا بالشكل ده مش هنزل اللعبة لا بعد ميت سنة.. و الحمد الله ان سيناريو اللعبة مالوش علاقه بالفيلم فقررنا نغير اسم اللعبة من بوحة لأبو حديد وننزل اللعبة عشان نقدر نحكم هانعمل لعب كمبيوتر تاني ولا كفاية علينا كدة..

على العموم احنا كنا متوقعين مشاكل طبعاً، دي ضريبة بيدفعها اي حد يحاول يعمل حاجة جديدة في البلد دي..

بالمناسبة اللعبة زي ما هي الي حد كبيرو فيها نفس الأفكار الصايعة .. منها انه في مرحلة بيحاول يعدي الترعة عشان يوصل لبيت العمدة .. وعشان يعرف يعدي الترعة لازم ياخد حبوب البلهارسيا من التمرجي المرتشي من الوحدة الصحية.. و في مرحلة تانية بيحاول يدمر المغارة بتاعة مطاريد الجبل.. و في مرحلة بيسابق بميكروباص الترامكوا و بيركب حمار مدرع مسلح بميترليوز..

ادعوا لنا بقي ..