طب و ليه بوحة؟

أه ه ه ... يادى بوحة, أنا برضه بقول ليه بوحة؟! وأحيانا كتير ماببقاش عارف الإجابة!

بس هأقولكم ليه بوحة.

أولا يمكن يكون الفيلم موش عاجب ناس كتير, بس الشخصية نفسها ظريفة! (عملنا إستفتائات فى الموضوع) كمان مناسبة جدا جدا للعبة. خصوصا إنه جزار وليه أسلحة وأدوات. ده غير إن سيناريو الفيلم فى حد ذاته أنسب للعبة منه لفيلم (ده رأى شخصى بس مبنى عن دراسة).

ده غير إن بوحة مافهوش أى شىء مخجل أو منافى للاّداب. ماتنسوش إن الهدف الأساسى والأول من أى لعبة هو الترفيه والمرح, قبل التعليم ونشر الوعى وخلق الثقافة و كل الكلام الكبير ده, اللى هانحاول نعمله برضه, بس من غير ما ننجرف و ننسى الهدف الأساسى والأول من أى لعبة!

أحمد الديب

؟ Games ليه الـ

ليه صحيح؟ هه؟ أه ه ... أنا الظاهر نسيت : )

أه!

أولا الصناعة دى حجمها على مستوى العالم 40 مليار (أى بليون) دولار! أى والله!

وفأمريكا بس حوالى 30 مليار, يعنى أقل من Hollywood بحاجة بسيطة!

ده كان أولا, ولا كان ثانيا؟ لأ أولا!

ثانيا بقى فان التكنولوجيا المستخدمة فى الألعاب الحديثة مش بس متقدمة جدا, دى كمان متشعبة فى مجالات كتير كلها مهمة (AI, Graphics, Networking, Optimization, Physics Simulation, etc.) وبتدخل فى العديد من المجالات الأخرى الصناعية والتكنولوجية, وبالتالى فالوصول لدرجة عالية فيها يعتبر مكسب رهيب.

ثالثا بقى المحتوى الفنى والثقافى والابداعى والترفيهى اللى فالموضوع! وده فى حد ذاته شىء ظريف, مهم و بنّاء.

طب ايه؟ نقدر نعمل الكلام ده؟ ... أه ه .. بعون الله نقدر.

طب هننجح؟ الله أعلم, ده شىء يعود عالسوق وعلى حاجات كتير مش كلها فى ادينا!

بس اللى أقدر أوعدكم بيه, هوة ان احنا هنعمل كل اللى نقدر عليه!!

أحمد الديب.

يا صباح الفل

أبدأ الكلام بالتحية والشكر لكل الناس اللى ساعدونا نوصل لهنا واللى هايساعدونا لسة :)

و بعدين التحية للناس الكتير اللى شجعونا ورفعوا معنوياتنا وحسسونا بالأمل.

وكمان تحية لكل واحد خد من وقته وشاف الكلام ده أو أى حاجة تانية عملناها.

وبعدين بأعلن عن أهم و أعمق أهدافنا , وهوه ان يبقى فيه صناعة مصرية قوية فى كل المجالات , وبالذات أصعب وأدق المجالات. لأن ده هو الطريق السليم لو عايزين نعيش بكرامة وشرف.

أحمد الديب